Monday, October 05, 2009

صْفِري

عمري ما فهمت شنو سالفة الصْـفِـري

يقولون دايماً هالأيام في الكويت الجو "صفري".. يعني تكثر فيه الأمراض ولازم الواحد يبتعد عن السباحة في البحر أو أحواض السباحة، مع العلم انه هالأيام الجو روعة والواحد يقدر يسبح ساعات من غير ما تبط راسه الشمس

الحرارة ما زالت تحوس بين 35 و 40 درجة مئوية، يعني في بلاد غير الكويت تعتبر عز الصيف ويمكن حتى موجة حر من النوع اللي يموتون فيها الشياب... البحر منعش لأقصى درجة، أحسن من الشوربة اللي نسبح فيها كل سنة بشهر يوليو وأغسطس.. مع انه السنة البحر كان أقل حرارة من العادة

فهل الصفري من أساطير الشياب والعجائز؟ وهل من المعقول أن تتعود أجسامنا على حرارات عالية تفوق الخمسين، لكي نشعر بالبرد ونخاف من السباحة عندما ترجع الحرارة إلى درجة مقبولة لدى سائر البشر؟ صج شعب دلوع


نعم الأمراض موجودة بسبب انتشار البكتيريا والميكروبات لكن لا علاقة للسباحة فيها يا ناس.. كل سنة أسبح إلى نهاية شهر أكتوبر ولم أمرض، وكما في عز الصيف ما عليكم سوى توخي الحذر من أجهزة التكييف بعد السباحة

طبعاً لا ننسى أن البحر هذه السنة بالذات ملوث بسبب كارثة مشرف لكن التلوث لم يصل بعد إلى مناطق جنوب الكويت أو حتى الجزر

استمتعوا بالسباحة إلى نهاية هذا الشهر... وبعدين كيفكم


17 comments:

  1. الصفري يعني الخريف

    ReplyDelete
  2. يعني مثل ما قالت فيروز؟ ورقو الأصفر شهر أيلول؟

    ReplyDelete
  3. هالحزه شرم الشيخ عجيبه معني اعتبرها overrated

    ReplyDelete
  4. بوستك يشيش .. بس الهوا البارد لما يهفهف يخلي الواحد يعيد النظر

    ReplyDelete
  5. احسن لا يسبحون!

    خل الزحمة تخف!

    ReplyDelete
  6. hehehe kel e9feri wentom b5eer

    ReplyDelete
  7. اول مرة اسمع هالكلمة

    يمكن لأني بعيد عن السباحة و البحر

    ReplyDelete
  8. لووووول

    عبالي الصفري بالشتا

    مو يقولون برد الصفري ؟؟؟

    مادري العيوز

    مادري الشايب

    و الله ضعت

    سوالف الشيبان وايد

    :)

    ReplyDelete
  9. صفرى يعنى يمرض! بحرنا هالحزة متروس جلي فش انخاف نسبح فيه

    ReplyDelete
  10. الكل اقولة ان السباحة هالوقت عجيبة. يقولون لاااااااا بررررررد :X

    ReplyDelete
  11. أوافقك بشدة .. جدا جدا :)

    وخاطري أروح البحر بصراحة بس مخوفينا بسالفة التلوث ;p

    تحياتي البحرية ..

    ReplyDelete
  12. دير بالك زيدون لا يروح بياضك من الشمس :)

    ReplyDelete
  13. mozart

    الله والبياض

    ReplyDelete
  14. يمكن هالكلام صح أيام قبل ... الحين أجسامنا مالها شغل بالجو بره من المكيفات

    و عجبني هذا
    borsa with his spam
    بالعربي

    ReplyDelete
  15. تقبل اطيب تحياتي
    seo

    ReplyDelete
  16. ‎بالفتره هذي تحوشني حساسيه من الجو... بس ماله شغل بالسباحه
    ‎اصلا الجو عجيب حق السباحه حزتها
    ‎خو ايام اول كل شي تأليف .. يطلعون اي حجه عشان يخرعونه

    ReplyDelete

Keep it clean, people!