Thursday, February 04, 2010

سؤال بري


نعم قرأتوها صح... بري وليس بريء... بري وليس بحري

اليوم الخميس وناس وايد بيطلعون اما للشاليهات أو للبر لقضاء "الويك إند" بعيداً عن صخب المدينة (اللي يسمع يقول نيويورك). الشاليهات أفهم سر جاذبيتها، فلا شيء أجمل من منظر البحر على مدار أيام السنة

لكن بالنسبة للبر فمنذ صغري لم أفهم المتعة المرجوة من "طلعة البر" والإقامة في خيام في عز البرد (قبل الاحتباس الحراري "جلوبل وورمنغ")، لكني لم أعترض على متعة غيري فلكل منا ما يمتعه ويؤنسه.. والناس أذواق! كما أفهم أيضاً جمال الصحراء عندما ندخل عدة كيلومترات بعيداً عن الطريق السريع، فهناك الهدوء والسكينة وخاصة عند فترة غروب الشمس

لكني مو قادر أفهم الناس اللي ناصبين خيامهم مقابل ميناء عبدالله بين طريق الفحيحيل السريع وطريق السفر!! يعني طالعين من بيوتكم عشان تقعدون بخيمتين عند الشارع العام وازعاج السيارات وتلوث الجو؟؟؟

ولا قادر أستوعب اللي ناصبين مخيماتهم على طرف الخط السريع ولاصقين بهارديز أو مكدونلدز! لعنبوكم هذي طلعة بر؟؟ ولا اللي مسوين زحمة ولوية عند المخرج اللي مقابل طريق 250 الجليعة؟؟ سيارات وباجيات وسياكل وعفيسة وكلهم تاركين البر اللي اشكبره ومتكودين بشارع ضيق... من صجكم؟؟

وسلامتكم... طلعت اللي بقلبي

11 comments:

  1. http://q8icartoons.blogspot.com/2010/02/blog-post_03.html

    ReplyDelete
  2. looooooooooooooooool

    لا تعصب هديلي أعصابك

    بس بغيت أوضح أنا وحده أكره البر واخو كله يحن علي تعالي المخيم ويكون ردي له
    أقد بداري بروحي

    ولا اقعد بمخيم






    المهم خليني أفسر لك شي


    بالنسبه حق اللي لاصقين مخيماتهم يمماكدونالدز ولا هارديز


    أتوقه والله أعلم عشان لي توهقوا بالاكل احترق ولا مايكفي الا هناك من يسعفهم



    وعلى طاري الزحمه صوب الجليعه



    أتوقع عشان القز
    واللع أعلم




    بس اللي مجابلين ميناء عبدالله
    هذيله ماني لاقيه لهم تفسير

    ;p

    ReplyDelete
  3. والله انا مثلك , ما احب البر و على قولتك استغرب من المزاج الخايس حق اللي طالع بر يخيم يم التمدن

    حلاته بمكان مقطوع

    ReplyDelete
  4. الناس ودها تقص علي عمرها انها مخيمه بالبر
    معاها انترنت و تأكل من هارديز لانها اصلا ما تطبخ بالبيت
    و بلايستيشن معاها

    ReplyDelete
  5. الناس تروح للجمعة و على سبيل العادة مثل ما وايد ناس تعودت تقول كلمة لين نست شنو معناتها

    الصحراء عجيبة لكن غرض التجمع غلب بغياب معاني الصحراء، أشياء مثل ليش هالمكان تغرز فيه السيارات أكثر، و الا ليش ذاك المكان فيه حصم بحر مع ان بعيد عن البحر أو أنواع الطيور اللي تيي و الزرع اللي يطلع

    ما أنسى لما كنا نجمع خبيز، و نذوق الحميض و احنا صغار

    ReplyDelete
  6. همممممممممممممم

    انا لا بر يعجبني و لا بحر يعجبني

    يبيلنا شي يديد

    ReplyDelete
  7. اكثر ناس يرفعون ضغطي اهم الي مخيمين جدام شاليهات بنيدر! شكو... ليش... ما ادري

    ReplyDelete
  8. لعب كرة الطائرة

    الشوي على الدوة أو الفحم و شرب الشاي اللي على مزاجك

    يمعة الربع بعد غياب سنوات

    تقدر تقول تغيير جو لا اكثر

    ReplyDelete
  9. بما إني لا أملك شاليه

    ولا أحب طلعات البر - حق المشق

    وين المفترض أروح

    ReplyDelete
  10. البر لي صار ما فيه الا انت وأهلك ما فيه أحلى منه
    هدوء وراحة وطبيعة وألعاب البر ودقاته

    لكن اللي وصفته يسمونه بر حضر :) (لول) ويذكرني في بر مشرف اللي مراسي الخيام تحوش بعض


    big shout out to all my 7ather friends :D

    ReplyDelete
  11. معاي بالدوام بدوي قُح نظام ليلحين عندهم حلال بالبر. يقول لو بغيت اروح البر اروح ليله وببيت شعر وبدون كهرب يقول هذه وناسة البر مو اخذ حمام وليتات ومطبخ وناس سيراميك (;

    ReplyDelete

Keep it clean, people!